ԴԺՎԱՐ ՍՑԵՆԱՐՈՎ ԽԱՂՈՒՄ՝ ՈՉ-ՈՔԻ «ԱԼԱՇԿԵՐՏԻ» ՀԵՏ

Fastex Պրեմիեր լիգայի 26-րդ տուրի շրջանակում «Ուրարտուն» արտագնա խաղում 1:1 հաշվով ոչ-ոքի ավարտեց հանդիպումը «Ալաշկերտի» հետ։ Մեր թիմի միակ գոլի հեղինակ դարձավ Միքայել Միրզոյանը, որը իրացրեց նշանակված 11 մետրանոցը։

Արդեն առաջին իսկ րոպեներից մեր թիմը գրոհների ճնշում էր գործադրում մրցակցի վրա՝ վերահսկելով գնդակը և զիջելու միտք անգամ չունենալով։ Գրոհները հիմնականում կազմակերվում էին աջ եզրից, որտեղ ակտիվ ու վտանգավոր էր Բրունո Միշելը։ Առաջին իրական գոլային պահը ստեղծվեց 9-րդ րոպեին՝ Խարիտոն Այվազյանի փոխանցումից հետո Մաքսիմ Պալիենկոն գեղեցիկ հարվածով փորձեց գրավել դարպասը, սակայն գնդակը չհասավ նպատակակետին:

«Ալաշկերտի» կազմում աչքի ընկավ «Ուրարտուի» նախկին խաղացող Գևորգ Տարախչյանը, որը մասնակցում էր գրոհների կազմակերպմանը: «Ալաշկերտը» փորձում էր հակագրոհներից բացի նաև դիրքային գրոհներ իրականացնել, սակայն «Ուրարտուի» պաշտպանությունն կանխում էր։ Լավ աշխատանք կատարեց Ալեքսանդր Պուսկո–Դմիտրի Տիխիյ զույգը: 35-րդ րոպեին մրցակցի կողմից վտանգավոր հարված իրացրեց Սարգիս Մեթոյանը, սակայն մեր դարպասապահ Ալեքսանդր Մելիխովը փայլուն սեյվ կատարեց: Այսպիսով, առաջին խաղակեսում գոլեր չեղան։

Երկրորդ խաղակեսում «Ուրարտուն» շարունակեց ակտիվ գրոհել՝ փորձելով պահպանել տեմպը և կոտրել մրցակցի պաշտպանությունը։ Եթե առաջին խաղակեսում գրոհներն ակտիվորեն զարգանում էին աջ եզրով, ապա խաղի շարունակությունում թիմը հաճախ տեղափոխում էր խաղը ձախ հատված: Մրցակցությունն ուժեղանում էր. երկու թիմերն էլ փորձում էին ճնշում գործադրել և կանխել միմյանց գրոհները, սակայն րոպեներ անց տեղի ունեցավ անսպասելի դրվագ՝ Դմիտրի Տիխիի անհաջող գործողության արդյունքում գնդակը հայտնվեց «Ուրարտուի» դարպասում: Որոշիչ էր դառնում հաջորդ դրվագը. «Ալաշկերտի» ավագ Արմեն Մանուչարյանը հեռացվեց խաղադաշտից՝ ստանալով կարմիր քարտ, ինչի արդյունքում «Ուրարտուն» ստացավ 11 մետրանոց իրացնելու հնարավորություն։ Այն վստահվեց Միքայել Միրզոյանին, որը սեպտեմբերից ի վեր բացակայում էր խաղադաշտից։ Արդյունքում՝ 84-րդ րոպեին, հավասարեցրեց հաշիվը: Չնայած հանդիպման ողջ ընթացքում ցուցաբերած ակտիվությանը, գրոհների բազմազանությանը և խաղի վերջին վայրկյաններին ուժերի գերլարումով պայքարին՝ «Ուրարտուն» չկարողացավ հասնել հաղթանակի:

Թիմը ոչ մի պահ չնահանջեց պայքարից, սակայն վերջնական արդյունքում գրանցվեց ոչ-ոքի։ Այս խաղից հետո «Ուրարտուն» վաստակեց 48 միավոր և զբաղեցնում է մրցաշարային աղյուսակի 3-րդ հորիզոնականը։