ՀԱՂԹՈՒՄ ԵՆՔ ԴԻՄԱԿԱՅՈՒԹՅՈՒՆՈՒՄ ԵՎ ՇԱՐՈՒՆԱԿՈՒՄ ՊԱՅՔԱՐԸ

ՈՒԵՖԱ Կոնֆերենցիայի լիգայի որակավորման առաջին փուլի պատասխան խաղում «Ուրարտուն» մրցեց էստոնական «Կալևի» հետ: Հանդիպումն ավարտվեց մեր թիմի հաղթանակով` 2-0 հաշվով: Մեր թիմի կազմից դուբլի հեղինակ դարձավ Միքայել Միրզոյանը։

ՊԱՍԻՎ, ԲԱՅՑ ՀԱՂԹԱԿԱՆ ԱՌԱՋԻՆ ԽԱՂԱԿԵՍ

Առաջին րոպեներից մեր թիմը վստահ սկսեց խաղը և արդեն 12-րդ րոպեյին Արման Ղազարյանի երկար փոխանցումից հետո գնդակին տիրեց Էդգար Մովսեսյանը, որն էլ փոխանցեց Միքայել Միրզոյանին և նա էլ դարձավ մեր թիմի առաջին գոլի հեղինակը։

 Գոլից հետո էլ մեր թիմը շարունակեց տիրել նախաձեռնությանը և մինչև խաղակեսի ավարտ ուներ մի քանի հիանալի հնարավորություն կրկնապատկելու հաշիվը։ Մեր մրցակիցը ևս ուներ մեկ-երկու հնարավորություն, բայց մեր թիմի երիտասարդ դարպասապահ Հայկ Ղազարյանի հիանալի խաղի շնորհիվ մեր դարպասը մնաց անառիկ։ Ընդմիջման գնացինք մեկ գոլի առավելությամբ։

ՊԱՏՄԱԿԱՆ ՀԱՂԹԱՆԱԿ ԿՈՆՖԵՐԵՆՑԻԱՆԵՐԻ ԼԻԳԱՅՈՒՄ

Երկրորդ խաղակեսը ևս սկսվեց մեր թիմի բացահայտ առավելությամբ և րոպեներ անց՝ իսկ ավելի կոնկրետ 49-րդ րոպեյին, թիմի կիսապաշտպան Միքայել Միրզոյանը Իվան Իգնատևի փոխանցումից հետո որը ի դեպ իր նորամուտը նշեց «Ուրարտույի» կազմում կրկնապատկեց թիմի առավելությունը՝ իր հաշվին գրանցելով դուբլ։

Մինչև հանդիպման ավարտը մեր տղաները գրագետ խաղի շնորհիվ կարողացան պահել հաշիվը, նույնիսկ ստեղծելով գոլային պահեր։

Այսպիսով՝  մեր թիմը 20 տարվա մեջ առաջին անգամ դուրս եկավ Եվրագավաթների խաղարկության երկրորդ փուլ։

Հավելենք, որ ՈՒԵՖԱ Կոնֆերենցիաների լիգայի երկրորդ փուլում մեր մրցակիցը կլինի Չեխիան ներկայացնող «Բանիկ» թիմը։ Առաջին հանդիպումը տեղի կունենա Օստրավայում հուլիսի 25-ին։