ՌՈԲԵՐՏ ԱՐԶՈՒՄԱՆՅԱՆ. «ՀԱՇՎԻՑ ՇԱՏ ԳՈՀ ԵՄ»

Մեր թիմի գլխավոր մարզիչը կարծիք է հայտնել հանդիպման մասին։

-Հաշվից շատ գոհ եմ, բայց բովանդակությունից ոչ այնքան, բայց այսպիսի խաղերը, թեկուզ ոչ այնքան լավ խաղով, պետք է հաղթել, որն արեցինք, շատ կարևոր էր: Փոխել էինք սխեման, նաև երևի թե 7 ֆուտբոլիստ, անցած խաղի համեմատ, նաև ունեինք նորամուտը նշող ֆուտբոլիստ, Ժորա Դադամյանը, որի համար շատ ուրախ եմ, 2 հարձակվող էին խաղում և այլն: Երևի, թե ավելի կարևոր էր հաղթանակը, որը չնայած մի քիչ խաբուսիկ է, մենք ունեինք որոշակի խնդիրներ, թե գնդակով և, թե առանց գնդակ խաղի ժամանակ:

-Ինչպե՞ս կգնահատեք Ժորա Դադամյանի խաղը, նա սկսեց մեկնարկային կազմում:

-Կարծում եմ, որ լավ հանդիպում անցկացրեց, հաշվի առնելով, որ առաջին հանդիպումն է, երկար ժամանակ չէր խաղացել կարող էր լարվածություն ունենալ, բայց այդ ամենը հաշվի առնելով կարծում եմ լավ հանդիպում անցկացրեց, երկար ժամանակ արժանի էր խաղալուն, և արժանացավ այսօր մեկնարկային կազմում լինելուն: Մեծ ցանկությամբ մարզվում էր, միայն ուրախ եմ իր համար, ընդհանուր ունեինք խնդիրներ պաշտպանությունում, ոչ իր հետ կապված, ուներ գոլային պահ, կարող էր նաև փոխանցում կատարել։ Լավ էր, որ խաղաց, նա եկավ դրան իր աշխատանքով:

- Ժիրայր Մարգարյանի վնասվածքի հետ կապված, մո՞տ է խաղադաշտ վերադառնալուն:

- Երկար ժամանակ փորձում էինք լուծում գտնել, այսպես ասած նոմինալ ձախ պաշտպան Ժորան է, Խարիտոնը աջ պաշտպան է, Վերեմեևին խաղացնում ենք, բայց, երբ նա է խաղում, ուրիշ ձև ենք գրոհում, նա կենտրոնական պաշտպան է։ Ունենք այդ խնդիրը, փորձում ենք լուծել, այսօր կարծում եմ Ժորա Դադամյանը մեզ որոշակի լուծումներ տվեց, թիմին օգնեց շատ, իսկ Ժիրայր Մարգարյանի մասով, բոլորս սպասում ենք նրա վերադարձին, հստակ ժամկետ չեմ կարող ասել, այս տարի, կարծում եմ, կհասցնի խաղ անցկացնել:

- Միքայել Միրզոյանը, երբ փոխարինման է մտնում, գոլեր է խփում։ Արդյո՞ք նա ավելի հարմար է փոխարինման մտնելուն, թե դա տակտիկական որոշում է:

- Նա մեր թիմի լավագույն ֆուտբոլիստներից է, եթե վերցնենք նրա ֆուտբոլային որակները, լավագույնը կարող է լինել, ամեն ինչ ունի: Բայց մենք ունենք մտածմունքներ խաղից առաջ, թե ով կարող է խաղը ուժեղացնել։ Ես կուզենամ, որ նա սկսի, և այն քիչ ֆուտբոլիստներից է, որ կարող է մտնել և խաղը փոխել, այդ բեռը մի քիչ նրա վրա է լինում։ Երևի թե, այդքան էլ արդար չէ, բայց, եթե ինքը ավելացնի նաև կոնցենտրացիա, շատ ավելի լավ կխաղա, որի մասին գիտի: Միգուցե այդքան էլ արդար չեմ, բայց նա է այդ ֆուտբոլիստը, որը կարող է տարբեր դիրքերում խաղալ, և խաղը փոխել: Նրա վրա է այդ առումով բեռը: Նա ըմբռնումով է մոտենում: Բայց գալու է այդ ժամանակը, երբ նա մեկնարկային կազմում է լինելու: Ինչպես նաև մնացած բոլորը պետք է հասկանալ, որ, երբ ունեցար ֆուտբոլում այդ հնարավորությունը ատամներով պետք է դրանից կառչես, մարզիչին քո լավ խաղով և մարզումներով ստիպես, որ հենց դու պետք է խաղաս մեկնարկային կազմում:

- Խոսեցիք պաշտպանության թերություններից, ինչպե՞ս կգնահատեք Էրիկ Փիլոյանի խաղը ընդհանուր առմամբ:

- Էրիկ Փիլոյանը տարուց ավել է լավագույն ֆուտբոլիստներից մեկն է ոչ միայն «Ուրարտուում», այլ նաև Հայաստանում լավագույն պաշտպաններից մեկն է, նաև «Ուրարտուի» խաղընկերների օգնությամբ հավաքականում է ամենաստաբիլ ֆուտբոիստներից մեկը: 10 օրում 4 հանդիպում անցակցրեց, մի քիչ շատ է ֆուտբոլիստի համար։ Չորսն էլ լավ խաղաց, փորձեցինք հանգիստ տալ նախորդ խաղում, բայց երկրորդ խաղակեսում ստիպված եղանք մտցնել, ինչպես նաև իր ընտանիքում լավ իրադարձություն կատարվեց, հավաքականում խաղեր անցկացրեց և այլն։ Կա մի քիչ կենտրոնացվածության խնդիր, բայց նա այն ֆուտբոլիստն է, որը, վստահ եմ, մյուս խաղից ավելի կենտրոնացված է խաղալու: Լավ հանդիպում անցկացրեց։ Նորմալ է, մեկնել հավաքական, խաղալ 4 հանդիպում, թռիչքներ, բայց նա շատ լավ, ոչ միայն այս, այլ նաև նախորդ սեզոն է անցկացրել, առաջխաղացում ունի։ Ուրախ եմ նաև, ակումբն ու խաղընկներներն էլ են ուրախ, որ հավաքականին տվել ենք շատ ուժեղ պաշտպան, որը միայն օգնում է հավաքականին, ինչպես նաև մեզ: