ԶԻՋԵՑԻՆՔ ՄՐՑԱԿՑԻՆ ԱՐՏԱԳՆԱ ԽԱՂՈՒՄ

Fastex Պրեմիեր լիգայի 8-րդ տուրի խաղում «Ուրարտուն» հյուրի կարգավիճակում մրցեց ԲԿՄԱ-ի հետ։ Հանդիպումն ավարտվեց մրցակցի հաղթանակով՝ 2-1 հաշվով։ Մեր թիմի միակ գոլը հեղինակել է Արտյոմ Պոլյարուսը։

Առաջին խաղակեսը վատ մեկնարկեց մեր թիմի համար։ Արդեն 5-րդ րոպեին մեր թիմի կիսապաշտպան Անդրեյ Կրավչուկը ստացավ ոտնաթաթի վնասվածք և հարկադրաբար փոխարինվեց։ Թիմերը հավասար խաղ էին անցկացնում և հիմնականում զգույշ էին գործում։ Առաջին վտանգավոր պահը ստեղծեցին մեր տղաները։ Էդգար Մովսեսյանը դուրս եկավ հարվածային դիրք, բայց գրոհը հարվածին չհասավ։ Ի պատասխան ԲԿՄԱ-ն 26-րդ րոպեին խփեց հանդիպման առաջին գոլը։ Եզրից կատարած փոխանցումից հետո պատահմամբ սեփական դարպասը գրավեց Էրիկ Փիլոյանը։ Բաց թողած գնդակից հետո «Ուրարտուն» տիրեց խաղային առավելությանը և 10 րոպե անց վերականգնեց հավասարությունը։ Արտյոմ Պոլյարուսի հարվածից հետո գնդակը դիպավ պաշտպանին և շեղելով ուղղությունը հայտնվեց դարպասում։ Անցավ 5 րոպե և մեր տղաները ևս մեկ գոլ խփեցին։ Անկյունային փոխանցումից հետո Փիլոյանի հարվածը հետ մղեց դարպասապահը և վրա հասած Մելքոնյան դարձավ գոլի հեղինակ, բայց գլխավոր մրցավարը այդ դրվագում մեր ֆուտբոլիստի կողմից նկատեց կանոնների խախտում և չեղարկեց այն։ Մինչև խաղակեսի ավարտ նոր գոլեր չգրանցվեցին և թիմերը գնացին հանգստի 1-1 հաշվի պայմաններում։

Երկրորդ խաղակեսում մեր թիմը համեմատաբար ավելի լավ սկսեց, ունեինք լավ պահեր, սակայն մրցակցի պաշտպանները և դարպասապահը կարողանում էին չեզոքացնել մեր գրոհները։ 58-րդ րոպեին հարվածային դիրքում հայտնվեց Կարեն Մելքոնյանը և փորձեց գրավել դարպասի մոտակա անկյունը, սակայն Արման Ներսեսյանը տեղում էր։ Հանդիպման միջնամասում և մեկ արտառոց դեպք տեղի ունեցավ մեր թիմի համար։ Փոխարինման դուրս եկած Սերգեյ Մկրտչյանը խախտեց խաղի կանոնները և ստանալով երկրորդ դեղին քարտը հեռացվեց խաղադաշտից։ Մնալով 10 հոգով մեր թիմը կրկին շարունակում էր տիրել խաղային նախաձեռնությանը։ Լավ պահեր կորցրեցին Ժիրայր Մարգարյանը և Կարեն Մելքոնյանը։ Ունենալով քանակական առավելություն ԲԿՄԱ-ն հանդիպման վերջում կարողացավ հաղթանակ կորզել։ Ավելացված 4-րդ րոպեյին Կառլենը Հովհաննիսյանը եզրափակեց սուր փոխանցումը և հաղթանակ պարգևեց իր թիմին։

Հավելենք, որ հաջորդ հանդիպումը մեր թիմը կանցկացնի տանը՝ ընդունելով «Նոա»-ին։ Հանդիպումը կկայանա սեպտեմբերի 29-ին՝ «Ուրարտու» մարզադաշտում և կմեկնարկի 19։00-ին։