ՄԱՐՏԱԿԱՆ ՈՉ-ՈՔԻ ԳՅՈՒՄՐԻՈՒՄ

Fastex Պրեմիեր լիգայի 28-րդ տուրի խաղում «Ուրարտուն» հյուրի կարգավիճակով մրցեց «Շիրակի» հետ: Մեր թիմի միակ գոլի հեղինակը Բրունո Միշելն էր։

«Ուրարտուն» ակտիվ մեկնարկեց հանդիպումը՝ առաջին իսկ րոպեներից պարտադրելով բարձր տեմպ և պայքար:

Ի դեպ, Արտյոմ Պոլիարուսն արդեն 13 գոլային փոխանցում ունի այս մրցաշրջանի Fastex Պրեմիեր Լիգայում՝ հերթական անգամ ընդգծելով իր արդյունավետությունը:

13-րդ րոպեին Նիկոլաս Կալուկյանը լուրջ վտանգ ստեղծեց «Շիրակի» դարպասի մոտ՝ շատ մոտ լինելով մրցաշրջանի իր երկրորդ գոլին:

Բրունո Միշելը շարունակում էր աչքի ընկնել իր ակտիվ և սուր գործողություններով:

«Ուրարտուն» փորձում էր կառուցել հարձակումները ձախ եզրով, ցուցաբերելով համբերատար խաղ և խելացի փոխանցումներ: Եթե առաջին րոպեներին որոշակի շտապողականություն էր նկատվում, ապա ժամանակի ընթացքում մեր ֆուտբոլիստները ավելի հանգիստ և վերահսկող խաղ սկսեցին ցուցադրել: «Շիրակը» փորձում էր կազմակերպել հարձակումներ, սակայն մեր պաշտպանությունը հուսալի էր և թույլ չէր տալիս վտանգավոր զարգացումներ: Ընդհանուր առմամբ, «Ուրարտուն» ավելի վտանգավոր մոտեցումներ ուներ մրցակցի դարպասին:

38-րդ րոպեին Մորի Կոնեն փորձեց գրավել մեր դարպասը, սակայն Գոռ Մատինյանը գերազանց միջամտեց և կանխեց վտանգը:

Առաջին խաղակեսի ընդհանուր պատկերը ցույց է տալիս, որ «Ուրարտուն» խաղում է ավելի կոմբինացված ոճով՝ նախընտրելով ցածր փոխանցումներով կառուցել խաղը, մինչդեռ «Շիրակը» սպասում է մեր թիմի հնարավոր սխալներին հակագրոհներ կազմակերպելու նպատակով:

Երկրորդ խաղակեսի մեկնարկին «Շիրակը» ակտիվացրեց իր հարձակողական գործողությունները՝ փորձելով վտանգավոր պահեր ստեղծել մեր դարպասի մոտ, սակայն մեր պաշտպանական գիծը գործեց վստահ և չթողեց մրցակցին իրացնել հնարավորությունները։ 59-րդ րոպեին «Ուրարտուն» շատ մոտ էր խաղի հաշիվը բացելուն։ Միքայել Միրզոյանի փոխանցումից հետո Վլադիսլավ Յակովլևը հայտնվեց հիանալի դիրքում, սակայն վրիպեց պատասխանատու պահին։ Ընթացքում մեր թիմը սկսեց ավելի հարձակողական տեսք ստանալ՝ մշտապես ճնշում գործադրելով մրցակցի պաշտպանության վրա։ 84-րդ րոպեին մեր ճնշումն արդարացվեց․ Բրունո Միշելը գեղեցիկ գոլի հեղինակ դարձավ՝ բացելով խաղի հաշիվը: Սակայն ընդամենը երկու րոպե անց՝ 86-րդ րոպեին, «Շիրակի» ֆուտբոլիստ Ռուդիկ Մկրտչյանը կարողացավ հավասարեցնել հաշիվը։

Մեր թիմը մինչև վերջին րոպեներ շարունակում էր պայքարել հաղթական գոլը խփելու համար, սակայն հանդիպումը ավարտվեց ոչ ոքի՝ 1-1 հաշվով։