ՌՈԲԵՐՏ ԱՐԶՈՒՄԱՆՅԱՆ․ «ԱՄԵՆ ԻՆՉ ԿՈՐՈՇՎԻ ԵՐԿՐՈՐԴ ԽԱՂՈՒՄ»

Մեր թիմի գլխավոր մարզիչ Ռոբերտ Արզումանյանը, «Նեմանի» դեմ տնային հանդիպումից հետո խոսել է արդյունքի մասին և պատասխանել լրագրողների հարցերին։

ԽԱՂԻ ՄԱՍԻՆ

«Զգացնել տվեց, որ առաջին պաշտոնական հանդիպումն էր, կար լարվածություն ի սկզբանե, որն ավելի շատացավ երկրորդ խաղակեսում։ Հոգեբանորեն և ֆիզիկապես կատարած աշխատանքից գոհ եմ։ Երկրորդ խաղակեսի 5 րոպեներին ուշադիր չէինք, բաց թողեցինք երկու գնդակ։ Երկրորդ հանդիպմանն ավելի լավ կմոտենանք, երևաց, որ մրցակիցը խաղում է ընթացիկ առաջնությունում։ Պատասխան խաղին կմոտենանք շատ ավելի լավ»։

ՄՐՑԱԿՑԻ ՄԱՍԻՆ

«Ինչ վերլուծել էինք և ինչ սպասում էինք՝ տեսանք խաղադաշտում։ Ունեն փորձառու ֆուտբոլիստներ, ավելի շատ խաղում են երկար գնդակների վրա՝ փորձելով կառչել երկրորդ գնդակներից։ Մեծ հաշվով մենք թերացանք, բայց այն ինչ մենք վերլուծեցինք կար խաղադաշտում։ Նրանք տարածություններ տալիս էին թե՛ կենտրոնում, թե՛ եզրերում, երբ պաշտպանվում էին, բայց չկարողացանք իրագործել մեր մտադրությունները»։

ՑԻՄԲԱԼՅՈՒԿԻ ԵՎ ՄՐՑԱԿՑԻ ՏԱՐԲԵՐՈՒԹՅԱՆ ՄԱՍԻՆ

«Չեմ կարող նախապատվություն տալ Թբիլիսիի «Դինամոյի» և «Նեմանի» միջև, քանի որ երկու տարբեր թիմեր են՝ տարբեր խաղացողներով և խաղաոճերով։ «Դինամոյին» չէի ցանկանա գնահատական տալ այդ մեկ խաղով, բայց երկուսն էլ լավ թիմեր էին։ Ի տարբերություն «Դինամոյի», բելառուսական «Նեմանն» իր առաջնությունում արդեն 15 հանդիպում անցկացրել է։

Ցիմբալյուկից գոհ եմ, բայց սա առաջին հանդիպումն էր և վերջում զգացվեց հոգնածություն որոշ ֆուտբոլիստների մոտ։ Կարծում եմ, որ լավ հանդիպում անցկացրեց»։

ՆԻԿՈԼԱՍ ԿԱԼՈՒԿՅԱՆԻ ՄԱՍԻՆ

«Մեկնարկային կազմն ընտրելիս մտածում ենք, թե որ ֆուտբոլիստներն ավելի մեծ էներգիա կտան և խաղ կփոխեն երկրորդ խաղակեսում։ Կալուկյանն իր գործն արեց։ Ինչ մենք պլանավորել էինք, որ երկրորդ խաղակեսում կուժեղացնի խաղը՝ եղավ։ Թե ինչ մեկնարկային կազմ կունենանք պատասխան խաղին ցույց կտան մարզումները»։

ԳՈՌ ՄԱՏԻՆՅԱՆԻ ՄԱՍԻՆ

«Յուրաքանչյուր կարմիր քարտ, ես հավատում եմ, որ ֆուտբոլիստի մեղավորությունն է։ Երիտասարդ է, պետք է էմոցիաները զսպի, հատկապես դարպասապահ է և պետք է ավելորդ էմոցիաներ չլինեն, բայց նա լավ հանդիպում անցկացրեց և շատ լավ դարպասապահ է։ Նա լինելու է մեր ազգային հավաքականի դարպասապահը տեսանելի ապագայում»։

ՓՈԽԱՐԻՆՈՒՄՆԵՐԻ ՄԱՍԻՆ

«Այն, ինչ մենք նախատեսել էինք երկրորդ խաղակեսում ֆուտբոլիստների խաղը փոխելու հետ կապված՝ արդարացված էր։ Այս վերջին երկու-երեք շաբաթների ընթացքում, ինչ գլխավորում եմ թիմը, այդ ֆուտբոլիստները մարզումներին մեծ էներգիա են տալիս։ Այսինքն, այն ինչ պլանավորել էինք՝ ստացանք, ուրիշ հարց է, որ առաջին խաղակեսի լարվածությունը առաջին պաշտոնական հանդիպմանը ցույց տվեց։ Թե ինչ կլիներ, եթե փոխարինման մտած ֆուտբոլիստները սկսեին խաղը՝ ոչ ոք չէր կարող ասել»։

ՀԱՆԴԵՐՁԱՐԱՆՈՒՄ ՄԹՆՈԼՈՐՏԻ ՄԱՍԻՆ

«Դիմակայության առաջին խաղակեսն ավարտվեց։ Ֆուտբոլ է, պարտվել ենք, բայց վստահ եմ, որ ավելի պատրաստված կլինենք, մենք ի զորու ենք անցնել այս մրցակցին և այդ տրամադրությամբ էլ կգնանք և հանդերձանարում ոչ մի արտառոց դեպք չի եղել»։