ՌՈԲԵՐՏ ԱՐԶՈՒՄԱՆՅԱՆ․ «ՄԵՆՔ ԱՄԲՈՂՋԱԿԱՆ ԼԱՎ ՀԱՆԴԻՊՈՒՄ ԱՆԿԱՑՐԵՑԻՆՔ»

Մեր թիմի գլխավոր մարզիչ Ռոբերտ Արզումանյանը, «Արարատ-Արմենիայի» դեմ խաղից հետո խոսել է հանդիպման և այլ թեմաների մասին։ 

ԽԱՂԻ ՄԱՍԻՆ

«Մենք ամբողջական լավ հանդիպում անցկացրեցինք, երկրորդ խաղակեսը շատ ավելի լավ քան առաջինը։ Առաջին խաղակեսում ունեինք մոտեցումներ, որոնք կարող էինք ավելի ռեալ դարձնել, բայց խաղում էինք լավ թիմի դեմ, լավ մարզչով և անհատապես լավ ֆուտբոլիստներով։ Արժանի չէինք պարտության, թե ինչքանով է հանդիպման հաշիվն արտացոլում խաղը՝ դժվար է ասել, բայց իմ սուբյեկտիվ կարծիքով մենք գերազանցեցինք «Արարատ-Արմենիային», հատկապես երկրորդ խաղակեսում»։

ՄՐՑԱԿՑԻ ՄԱՍԻՆ

«Իմ թիմը գիտեր, թե ինչպես վարվեր, բայց «Արարատ-Արմենիան» ևս։ Խնդիրը ճիշտ եք նկատել՝ շտապողականությունը։ Կարծում եմ լավ էինք դուրս գալիս պրեսինգից, բայց շտապողականություն էինք ցուցաբերում վերջին հատվածում։ Ինչ-որ տեղ ուշացնում էինք, ինչ-որ տեղ՝ շտապում։ Ընդմիջմանը մենք ասացինք, որ պետք է լինել արագ բայց համբերատար ու շտկեցինք դա։ «Արարատ-Արմենիան» ունի երեք կենտրոնական պաշտպան, որոնք մենապայքարներում լավն են, արագ են։ Կրկնեմ, որ շատ լավ թիմ է՝ լավ ֆուտբոլիստներով։ Երևի թե այս պահին առաջնության լավագույն թիմերն էին խաղում»։

ՄԱՐՏԱՎԱՐՈՒԹՅԱՆ ՄԱՍԻՆ

«Մենք պատրաստվել էինք միայն երեք կենտրոնական պաշտպաննների վրա, քանի որ նույնիսկ չորսի դեպքում գրոհում են երեքով։ Լինում է, որ Կարեն Մուրադյանն է նահանջում և դառնում երրորդը, լինում է Բալանտան, բայց հիմնականում Մուրադյանը։ Մենք միայն այս սխեմային էինք պատրաստվել։ Եթե խաղային չորս պաշտպանով՝ խնդիր չունեինք, իսկ մեր հարձակման դեպքում էլ ունենք մեր պրինցիպները։ Չէինք կենտրոնացել երեք-չորս պաշտպանով խաղի վրա»։

ԿԱՄՈ ՀՈՎՀԱՆՆԻՍՅԱՆԻ ԴԵՂԻՆ ՔԱՐՏԻ ՄԱՍԻՆ

«Իմ կարծիքով պետք է ստանար երկրորդ դեղին քարտն ու կարմիրով հեռանար։ Եղավ հակառակն ու Նարեկ Աղասարյանը ստացավ դեղին քարտ ու բաց կթողնի հաջորդ հանդիպումը»։

«ԱԼԱՇԿԵՐՏԻ» ՄԱՍԻՆ

«Այսօր, այս պահին, դա իմ կարծիքն է։ «Ալաշկերտի» մոտ մի փոքր հոգնածություն նկատվում է վերջին խաղերում, բայց կրկին շատ լավ ֆուտբոլ են խաղում, հոգնածությունը նորմալ է իրենց մոտ։ Վերջին արդյունքներով, կարծում եմ կարող եմ գնահատել «Արարատ-Արմենիային» և հատկապես մեր թիմին»։

ԲՐՈՒՆՈ ՄԻՇԵԼԻ ՄԱՍԻՆ

«Առաջնության լավագույն ռմբարկու լինելն արդեն գնահատական տալիս է։ Նա ավելացնում է մյուս խաղային որակներում։ Պաշտպանությունում ոչ այդքան, որքան ցանկալի է, բայց ավելացնում է։ Նա վտանգավոր է եզրերում, կիսաեզրերում, մեկը՝ մեկի դեմ և արագացումներ է կատարում։ Բնականաբար գոհ եմ»։

ՖՈՒՏԲՈԼԻՍՏՆԵՐԻ ԴԻՐՔԵՐԻ ՄԱՍԻՆ

«Ես թույլ եմ տալիս ֆուտբոլիստներին որոշումներ կայացնել ըստ իրավիճակի՝ պահելով մեր պրինցիպները։ Նրանք արդեն խաղի ընթացքում փորձում են կայացնել լավագույն որոշումը։ Ճիշտ եք նկատել, կարծես թե վատ չի ստացվում»։

ԵԼՈՒՅԹՆԵՐԻ ՄԱՍԻՆ ԵՎՐԱԳԱՎԱԹՆԵՐՈՒՄ

«Ամեն ինչ իր պատմությունն ունի։ Ամենայն հարգանքով, բայց չեմ կարողանում հասկանալ ինչու են կպել այս պատմությանը։ Հայկական շատ թիմեր երկար ժամանակ հաջողության չեն հասել եվրագավաթներում, հասել են մի քանի թիմեր։ Այո, պետք է վերլուծել, հասկանալ թե որն է խնդիրը։ Այո, այդ պահին մենք խաղում էինք «Նեմանի» դեմ, որի առաջնությունն ընթացքի մեջ էր, բոլոր ֆուտբոլիստները փորձառու էին։ Սրանից երկու տարի առաջ հասել էին վերջին փուլ։ Նրանք դուրս մնացին «Ռայո Վալյեկանոյից», բայց դա չի ստորադասում այն խնդիրները, որոնք մենք պետք է լուծենք և ավելի լավ պատրաստվենք։ Ես չեմ վերագրում նրան, որ նոր եմ եկել, այլ վերագրում եմ ֆուտբոլիստների խաղային պրակտիկայի բացակայությունը։ Մեկ ընկերական խաղացինք Թբիլիսիի «Դինամոյի» դեմ, մեզ օգնեց «Շիրակը» և վերջ։ Դա պատճառաբանություն չի, բայց եթե մեզ հանդիպեր թիմ, որը նույնպես գտնվում էր նախապատրաստական շրջանում, գուցե ավելի խոշոր պարտվեինք, գուցե հաղթեինք՝ չգիտեմ, հիմա մենք առաջնությունում ենք ու կենտրոնանում ենք վաղվա հանգստի վրա»։

ԷՐԻԿ ՓԻԼՈՅԱՆԻ ՄԱՍԻՆ

«Ես Էրիկին շուտվանից գիտեմ, բայց հունիս-հուլիս ամսիներին համեմատ շատ մեծ է տարբերությունը։ Ես փորձում եմ գտնել ֆուտբոլիստների համար լավագույն դիրքը, ամենաօպտիմալ տարբերակը, որ յուրաքանչյուրին հարմար լինի այդ դիրքում։ Էրիկ Փիլոյանը հիմա գտնվում է հոգեբանական ու խաղային մեծ վերելքի մեջ, ու հոգեբանական լավ վիճակի հիման վրա ֆիզիկական, տեխնիկական որակները ևս վերելք են ապրում։ Ես հավաքական գնալուց առաջ նրան ասեցի, որ կարևորը ֆուտբոլիստը մտնի հայ երկրպագուի ընտանիքներ իր խաղով և պահվածքով։ Կարծում եմ, որ նա դա արել է»։

ՍԵՐԳԵՅ ՄԿՐՏՉՅԱՆԻ ՄԱՐԶԱՎԻՃԱԿԻ ՄԱՍԻՆ

«Մոտենում է, բայց դեռ չի մոտեցել իր լավագույն մարզավիճակին։ Չգիտեմ, թե Սերգեյ Մկրտչյանի ներուժը որտեղ է, կարող է լինել շատ ավելին։ Այն խաղամակարդակին որ կար՝ մոտենում է։ Դեռ ժամանակ պետք է։ Չմոռանանք, որ ծանր վնասվածք ուներ, խաղային պրակտիկայի բացակայություն, բայց լավ մարզավիճակում է»։

ՀԱՅ ՖՈՒՏԲՈԼԻՍՏՆԵՐԻ ՍԱՀՄԱՆԱՓԱԿՄԱՆ ՄԱՍԻՆ

«Մենք ունենք ֆուտբոլիստ, որ «Ուրարտուի» ակադեմիայից չի՝ Նիկոլաս Կալուկյանը։ Ես ինքս եմ առաջին ընտրությունը կատարում «Ուրարտուի» ակադեմիայից, այդպես պետք է լինի, բայց ֆուտբոլ է՝ չգիտես, թե ինչ կլինի։ Խաղից առաջ երբևէ չենք մտածել կանոնակարգով հայերի քանակ ապահովելու համար։ Դա դեռ չեմ զգում, ու կուզեինք որ բոլորն էլ չզգան դա»։