ՌՈԲԵՐՏ ԱՐԶՈՒՄԱՆՅԱՆ․ «ԱՐԺԱՆԻ ԷԻՆՔ ՀԱՂԹԱՆԱԿԻ»

Մեր թիմի գլխավոր մարզիչ Ռոբերտ Արզումանյանը «Գանձասարի» դեմ խաղից հետո խոսել է հաղթանակից և պատասխանել լրագրողների հարցերին։

ԽԱՂԻ ՄԱՍԻՆ

«Բարդ հանդիպում էր։ Մրցակիցը բավականին լավ ֆուտբոլ է խաղում գարնանային հատվածից սկսած, բայց մենք կարողացանք ճնշումը մեծացնել ու հասնել դրական արդյունքի։ Առաջին 25-30 րոպեն մենք խաղում էինք այն ֆուտբոլը, որը ուզում էինք ստանայինք, բայց չկար վերջին արագացումը, փոխանցումը կամ որոշումը։ Դրանից հետո խաղը ստացավ այն սցենարը, որը ավելի ձեռնտու էր «Գանձասարին», կային արագ գրոհներ։ Ամեն դեպքում, շնորհակալություն ֆուտբոլիստներին։ Առանձնակի ուրախ եմ, որ Արման Ղազարյանը խաղաց և գոլի հեղինակ դարձավ։ Արժանի էինք հաղթանակի»։

ԳՈԼԱՅԻՆ ՊԱՀԵՐԻ ՄԱՍԻՆ

«Շատ ուրախ եմ, որ արդեն որերորդ հանդիպումն է փոխարինման մտած ֆուտբոլիստների լավ են հանդես գալիս։ ԲԿՄԱ-ի դեմ ևս Էդիկ Վարդանյանը, որն ուներ 3-4 գոլային պահեր, ինչպես նաև Դավիթ Հարությունյանը լավ դուրս եկավ խաղադաշտ և դա գովելի է։ Մենք ավելի լավ խաղում էինք առաջին խաղակեսի առաջին հատվածում։ Ավելի լավ նկատի ունեմ, այն ֆուտբոլը, որն ուզում էինք։ Խաղավերջում ճնշում գործադրեցինք, տարածությունները մեծ էին։ Մենք հոգնել էինք, բայց մրցակիցն՝ ավելի շատ և հասանք արդյունքի։ Խաղադաշտ էր դուրս եկել Արման Ղազարյանը, հարկադրաբար, քանի որ վնասվածք ստացավ Անտոն Բրատկովը։ Գուցե նա մնար խաղադաշտում և 3 գոլ խփեր, չգիտեմ»։

ԷԴԻԿ ՎԱՐԴԱՆՅԱՆԻ ՄԱՍԻՆ

«Նա վնասվածք չունի, ուղղակի հոգնածություն էր ու մկանային գերլարում։ Ես կարծում եմ, որ Էդիկը ունի գրեթե ամեն հատկություն կենտրոնական հարձակվողի համար։ Եվրոպական չափանիշներով՝ աթլետիկ տվյալներ ու արագություն։ Որոշակի որակներ պետք է բարելավվի, բայց դա կգա խաղակցվածության ու փորձի հետ միասին։ Դեռ երիտասարդ է, բայց ունի լավ որակներ»։

ՊԱԼԻԵՆԿՈՅԻ ԵՎ ՅԱԿՈՎԼԵՎԻ ՀԵՌԱՆԱԼՈՒ ՄԱՍԻՆ

«Արագ էր ամեն ինչ, պատրաստվում էինք «Նեմանի» խաղին։ Ակումբը, մենք ու ֆուտբոլիստները դրական ենք իրար հրաժեշտ տվել, բայց տարբեր պատճառներ են եղել։ Մենք ունենք լավ ֆուտբոլիստներ, ամեն դիրքում ունենք 2 հավասարազոր ֆուտբոլիստներ, գոհ եմ»։

ԱՐՏԵՄԻ ԳՈՒՆԿՈՅԻ ՄԱՍԻՆ

«Գունկոն լավ է խաղում, երբ մտնում է փոխարինման լավ է իրեն դրսևորում։ Ունի լավ բնավորություն, մարտիկի նման։ Կխաղա 1,5 թե 90 րոպե, խաղում է նույն ձև։ Դա շատ բանի մասին է ասում իր մասին։ Ունի որակներ, որոնք պետք է զարգացնել, բայց դա կգա ժամանակի հետ միասին»։