ՌՈԲԵՐՏ ԱՐԶՈՒՄԱՆՅԱՆ․ «ԹԻՄՈՒՄ ՇԱՏ ԼԱՎ ՄԹՆՈԼՈՐՏ Է»

Մեր թիմի գլխավոր մարզիչ Ռոբերտ Արզումանյանը, «Շիրակի» դեմ խաղից հետո մեկնաբանալ է հաղթանակն ու պատասխանել լրագրողների հարցերին։

ԽԱՂԻ ՄԱՍԻՆ

«Անցկացրեցինք շատ լավ առաջին խաղակես և ստեղծեցինք բազում գոլային պահեր։ Գնդակով և առանց գնդակ լավ էինք խաղում։ Երկրորդ խաղակեսի սկիզբը անուշադիր էինք տեղերում, բայց չեմ կարծում, որ դա կապված է հաշվի հետ։ Կային դրվագներ, որտեղ շուտ էինք կորցնում գնդակը և երկրորդ խաղակեսի սկիզբն ավելի շատ տեղափոխությունների մասին էր։ Շնորհավորում եմ բոլոր ֆուտբոլիստներին, հատկապես Կարեն Մելքոնյանին։ Նա ուներ վնասվածք, բայց աշխատասիրության, նպատակասլացության և բժշկական անձնակազմի շնորհիվ վերադարձավ, գոլ խփեց։ Շնորհավորում եմ բոլորին, հատկապես նրանք, որոնք շատ խաղաժամանակ չեն ստանում, բայց մարզումների ժամանակ առանձնանում են, օգնում են թիմակիցներին»։

ԱՐԹՈՒՐ ՄԵԼԻՔՅԱՆԻ ՄԱՍԻՆ

«Նա լավ է մարզվում, ունի լավ որակներ և նրան ևս շնորհավորում եմ։ Կենտրոնական պաշտպանի դիրքում ունենք մեծ մրցակցություն։ Նա հավասարի պես մրցակցում է մյուսների հետ, լավ է դրսևորում իրեն մարզումներին։ Այսօր համոզվեցինք, քանի որ դուրս եկավ խաղադաշտ առաջին անգամ և լավ խաղաց։ Սա ցույց է տալիս նրա մոտեցումը մարզումներին»։

ՊՐՈՖԵՍԻՈՆԱԼԻԶՄԻ ՄԱՍԻՆ

«Վտանգ չկա, բայց նրանք շատ կարևոր ֆուտբոլիստներ են։ Ֆուտբոլը տարբերվում է մնացած բոլոր մասնագիտություններից։ Այլ մասնագետ կարող է գնալ աշխատանքի չքնած, կամ անձնական խնդիրներով։ Օրինակ, բանկի աշխատողը կարող է գնալ ու այդպես աշխատել, իսկ ֆուտբոլում այդպես չէ, եթե դու եկել ես անձնական խնդիրներով, ապա լավ չես մարզվի, դրանից թիմակիցներդ լավ չեն մարզվի, վատ կմոտենաս հանդիպմանն ու վատ կխաղաս։ Մենք ունենք շատ լավ մթնոլորտ թիմում։ Ունենք ընդամենը մեկ ֆուտբոլիստ, որը չի խաղացել առաջնությունում՝ Անդիյա Դրագոևիչը, որին ևս շնորհակալ եմ։ Նա շատ է օգնում դարպասապահներին իր փորձով և վերաբերմունքով։ Նա խաղացել է «Նեմանի» դեմ, սա խոսում է նրա պատասխանատվության մասին»։

ԴԱՎԻԹ ՀԱՐՈՒԹՅՈՒՆՅԱՆԻ ՄԱՍԻՆ

«Այսօր դժվար էր։ Դավիթը լավ է իրեն դրսևորել այն խաղերում, որում մասնակցել էր։ Նա լավ մարզավիճակում է, բայց մենք ունենք փոփոխության 5 հնարավորություն։ Պետք է ստանային խաղաժամանակ նրանք, որոնք քիչ են խաղում»։